Италиянинг «Сассуоло» клуби бош мураббий Фабио Гроссо истеъфога чиққанидан сўнг жамоа бошқаруви Альберто Аквиланига топширилганини расман эълон қилди.

«Сассуоло» футбол клуби асосий жамоанинг янги бош мураббийи сифатида Альберто Аквилани тайинланганини мамнуният билан эълон қилади», — дейилади клуб расмий сайтида эълон қилинган баёнотда.

1984 йилда Римда туғилган Аквилани футболчилик фаолияти давомида «Рома», «Ливерпуль», «Ювентус» ва «Милан» каби Европанинг етакчи клубларида тўп сурган. У 2017 йилнинг январь ойида футболчи сифатида «Сассуоло» сафига келиб қўшилган ва «қора-яшиллар» либосида 16 та ўйинда (1237 дақиқа) майдонга тушиб, жамоа аъзолари ҳамда мухлисларда илиқ таассурот қолдирган эди.

Аквилани мураббийлик фаолиятини 2019 йилнинг июль ойида «Фиорентина»нинг 18 ёшгача бўлган (U18) жамоасида бошлаган, бироқ қисқа вақт ичида асосий жамоада Жузеппе Якинининг ёрдамчисига айланган.

2020 йилнинг июлидан бошлаб у «Фиорентина» ёшлар жамоасини бошқарди ва кетма-кет уч мавсум (2019/20, 2020/21, 2021/22) Италия ёшлар Кубогида зафар қучди, шунингдек, Суперкубокни ҳам қўлга киритди. 2022/23 йилги мавсум якунларига кўра, Аквилани чемпионатнинг мунтазам мавсумида 3-ўринни, финал босқичида эса 2-ўринни эгаллаб, «Энг яхши ёшлар мураббийи» совринига лойиқ кўрилди.

2023 йилнинг июнида мутахассис «Пиза» клуби бошқарувига ўтди ва дебют мавсумида Б Серия турнир жадвалида 46 очко билан 13-ўринни эгаллади. Бир йиллик танаффусдан сўнг у «Катандзаро» клубини бошқариб, 59 очко билан 5-ўринни банд этди. Унинг қўл остида жамоа плей-офф босқичида «Авеллино» ва «Палермо» клубларини мағлуб этди. А Серия йўлланмаси учун «Монца»га қарши кечган ҳал қилувчи баҳс дуранг билан якунланди, бироқ Ломбардия клуби турнир жадвалида юқорироқ ўринни эгаллагани эвазига элитага йўл олди.