Германия терма жамоаси ярим ҳимоячиси Йозуа Киммих 2026 йилги жаҳон чемпионатидаги Кюрасао терма жамоасига қарши илк ўйин олдидан ўз фикрлари билан ўртоқлашди.

«Биз Германияни янада фахрланишга мажбур қилмоқчимиз. Бу бизнинг асосий мақсадимиз. Биз бу ерда бутун мамлакатимиз номидан иштирок этаётганимизни биламиз. Германия сафида йирик турнирда қатнашиш — бу мутлақо ўзгача туйғу. Бизда Германияда ҳаяжон ва қувонч уйғотиш имконияти бор. Сардор сифатида менинг ролим бироз ўзгачароқ аҳамият касб этди. Жамоамизда ижобий энергияни ҳис қиляпман. Агар бор кучимизни ишга солиб, қалб, қатъият ва иштиёқ билан ўйнасак, бу энергияни бутун мамлакатга етказа оламиз ва 2006 йилги жаҳон чемпионатидаги каби руҳий кўтарилишни ҳосил қилишимиз мумкин. Ўша мундиални болаликда ўз кўзим билан кўрганман. Албатта, майдонда қийинчиликларга дуч келадиган дамлар ҳам бўлади, аммо ортимизда бутун мамлакат турганини билиш бизга катта куч беради», — дея Киммихнинг сўзларини келтиради Bild нашри.

Эслатиб ўтамиз, Германия терма жамоаси охирги марта 2014 йилда жаҳон чемпиони бўлган эди.