Испания терма жамоаси устози Луис де ла Фуэнте «қизил фурия»нинг Шимолий Америка мезбонлик қилаётган Жаҳон чемпионати – 2026 фаворити сифатида кўрилаётганига ўз муносабатини билдирди.
«Фаворит мақоми умуман ҳеч нарсани кафолатламайди. Жаҳон чемпионати каби турнирларда кўплаб жамоалар ғалабага даъвогарлик қилади. Дастлаб фаворитлар қаторида тилга олинмаган жамоа ҳам чемпион бўлиши мумкин. Мундиалда ҳар бир ўйин жуда оғир ўтади», — дея мутахассиснинг сўзларини келтиради Marca газетаси.
Испания терма жамоаси Жаҳон чемпионатидаги ўзининг илк учрашувини Кабо-Вердега қарши ўтказади. Мазкур баҳс бугун, 15 июнь куни бўлиб ўтади ва ўйин Тошкент вақти билан соат 21:00 да бошланиши режалаштирилган.
