«Манчестер Юнайтед» вингери Амад Диалло Кот-д’Ивуар терма жамоаси сафида ЖЧ-2026 гуруҳ босқичи 1-туридан ўрин олган Эквадорга қарши учрашувда ўз маҳоратини намойиш этди.
23 ёшли футболчи баҳснинг 56-дақиқасида захирадан майдонга тушди ва 90-дақиқада учрашувдаги ягона гол муаллифига айланди. Бундан ташқари, SofaScore маълумотларига кўра, Диалло тўлиқ бўлмаган бир тайм ичида рақибларини 6 марта алдаб ўтишга муваффақ бўлган. Бу жорий мундиалдаги исталган бошқа футболчидан (ҳатто майдонда тўлиқ 90 дақиқа ҳаракат қилганларни қўшиб ҳисоблаганда ҳам) кўпроқ кўрсаткичдир.
Кот-д’Ивуар терма жамоаси 1-турдан сўнг «E» квартетида иккинчи ўринни эгаллаб турибди. Биринчи поғонадан эса Кюрасао терма жамоасини 7:1 ҳисобида тор-мор этган Германия жой олган.













