Испания терма жамоаси футболчилари агар жамоа турнирнинг 1/4 финал босқичигача етиб бормай мусобақани тарк этса, 2026 йилги Жаҳон чемпионатидаги иштироки учун бериладиган мукофот пуллардан воз кечишади. Бу ҳақда Actu Foot нашри машҳур L’Équipe онлайн-нашри маълумотларига таяниб хабар бермоқда.

Қайд этилишича, испанлар «Фурия Роха»нинг ғалабаси билан якунланган Евро-2024 мусобақасида ҳам худди шундай позицияни эгаллашган эди. Испания ЖЧ-2026даги юришини «H» гуруҳидан бошлади, у ерда жамоага Кабо-Верде, Саудия Арабистони ва Уругвай терма жамоалари рақиблик қилмоқда.

Маълумот учун, 2026 йилги Жаҳон чемпионати АҚШ, Мексика ва Канада майдонларида бўлиб ўтмоқда. Турнир 11 июнь куни старт олди ва 19 июлга қадар давом этади. Амалдаги жаҳон чемпиони Аргентина терма жамоаси ҳисобланади.