Бельгия терма жамоаси бош мураббийи Руди Гарсия ЖЧ-2026 гуруҳ босқичи 1-тури доирасида Мисрга қарши кечган ва 1:1 ҳисобидаги дуранг билан якунланган учрашув натижаларини сарҳисоб қилди.
"Миср дарвоза томон йўллаган илк аниқ зарбасидан сўнг гол урди, бундай жамоа ҳисобда олдинга чиқиб олганидан кейин эса уларга қарши ўйнаш янада қийинлашади. Энг муҳими, биз ўйиндан чиқиб кетмадик. Захирадан майдонга тушган футболчи эвазига ҳисобни тенглаштиришга муваффақ бўлдик ва бу таркибдаги ҳар бир ўйинчи қанчалик муҳим эканлигини кўрсатади. Ғалаба қозониш учун бизда имкониятлар бўлди, бироқ рақиб дарвозабони бир нечта ажойиб сейвларни амалга оширди", — дея Гарсиянинг сўзларини келтиради ФИФА матбуот хизмати.
1-турдан сўнг Бельгия ва Миср терма жамоалари ҳисобида биттадан очко мавжуд. Олдинда ҳар икки жамоани жаҳон чемпионати гуруҳ босқичининг яна иккитадан учрашуви кутмоқда.
