Марокашлик ярим ҳимоячи Исмаэль Сайбари Мюнхеннинг «Бавария» клубига ўтиш арафасида турибди. Бир қатор инсайдерларнинг хабар беришича, ушбу келишув 55 миллион еврога тушади ва бу трансфер лига тарихидаги энг қиммат бешта сотувдан бирига айланади.

Рекорд бразилиялик вингер Антонига тегишли бўлиб, у 2022 йилда «Аякс»дан «Манчестер Юнайтед»га 100 миллион евро эвазига кўчиб ўтган эди. Иккинчи ўринда Френки де Йонгнинг 2019 йилда 86 миллион евро эвазига «Барселона»га сотилиши қайд этилган бўлса, кучли учликни Амстердам клубининг яна бир вакили Маттейс де Лигт якунлаб беради — у ўша йили 85 миллион евро эвазига «Ювентус»га йўл олганди. Тўртинчи поғона Лисандро Мартинесга тегишли (2022 йилда «Аякс»дан «Манчестер Юнайтед»га 57 миллион еврога ўтган), бешинчи ўринни эса, юқорида таъкидланганидек, Исмаэль Сайбари эгаллайди.

Шунингдек, кучли ўнликдан Коди Гакпо (2023 йилда ПСВдан «Ливерпуль»га 49 миллион евро), Йоррель Хато (2025 йилда «Аякс»дан «Челси»га 44 миллион евро), Муҳаммад Кудус (2023 йилда «Аякс»дан «Вест Хэм»га 43 миллион евро), Давинсон Санчес (2017 йилда «Аякс»дан «Тоттенхэм»га 42 миллион евро) ва Ирвинг Лосанонинг (2019 йилда ПСВдан «Наполи»га 40 миллион евро) трансферлари жой олган.