Marokashlik yarim himoyachi Ismael Saybari Myunxenning «Bavariya» klubiga o‘tish arafasida turibdi. Bir qator insayderlarning xabar berishicha, ushbu kelishuv 55 million yevroga tushadi va bu transfer liga tarixidagi eng qimmat beshta sotuvdan biriga aylanadi.

Rekord braziliyalik vinger Antoniga tegishli bo‘lib, u 2022 yilda «Ayaks»dan «Manchester Yunayted»ga 100 million yevro evaziga ko‘chib o‘tgan edi. Ikkinchi o‘rinda Frenki de Yongning 2019 yilda 86 million yevro evaziga «Barselona»ga sotilishi qayd etilgan bo‘lsa, kuchli uchlikni Amsterdam klubining yana bir vakili Matteys de Ligt yakunlab beradi — u o‘sha yili 85 million yevro evaziga «Yuventus»ga yo‘l olgandi. To‘rtinchi pog‘ona Lisandro Martinesga tegishli (2022 yilda «Ayaks»dan «Manchester Yunayted»ga 57 million yevroga o‘tgan), beshinchi o‘rinni esa, yuqorida ta’kidlanganidek, Ismael Saybari egallaydi.

Shuningdek, kuchli o‘nlikdan Kodi Gakpo (2023 yilda PSVdan «Liverpul»ga 49 million yevro), Yorrel Xato (2025 yilda «Ayaks»dan «Chelsi»ga 44 million yevro), Muhammad Kudus (2023 yilda «Ayaks»dan «Vest Xem»ga 43 million yevro), Davinson Sanches (2017 yilda «Ayaks»dan «Tottenxem»ga 42 million yevro) va Irving Losanoning (2019 yilda PSVdan «Napoli»ga 40 million yevro) transferlari joy olgan.