Қозоғистоннинг "Астана" клуби ўзбекистонлик қанот ҳужумчиси Асилбек Абдурасулов билан ҳамкорлик якунланганини расман эълон қилди.
18 ёшли футболчи жорий йилнинг апрель ойида "Ғазалкент" жамоасидан ижара асосида «Астана» сафига қўшилган эди. У пойтахт клуби таркибида жами 7 та учрашувда майдонга тушди. Шуларнинг 5 таси Қозоғистон Премьер-лигаси доирасида бўлиб, футболчи самарали ҳаракатлари билан ажралиб тура олмади.
Клуб матбуот хизмати қуйидаги баёнотни эълон қилди:
«Асилбекка клубимизда ўтказган вақти учун миннатдорчилик билдирамиз ва унинг кейинги фаолиятига омад тилаймиз».
Қайд этиш жоиз, Қозоғистон Премьер-лигаси-2026 мавсумининг 13 туридан сўнг бош мураббий Григорий Бабаян бошқараётган «Астана» 22 очко жамғариб, мусобақа жадвалида тўртинчи ўринни эгаллаб турибди.













