Мадриднинг «Реал» клуби «Манчестер Сити» собиқ ярим ҳимоячиси Бернарду Силванинг эркин агент мақомида жамоага ўтганини эълон қилди.

Superdeporte нашрининг хабар беришича, трансфернинг бепул амалга ошганига қарамай, Мадрид клуби португалиялик футболчи учун барибир катта миқдорда маблағ сарфлашига тўғри келади. «Қаймоқранглилар» футболчининг маоши, солиқлар ва агентлик воситачилик ҳақлари (комиссия тўловлари) учун умумий ҳисобда тахминан 100 миллион евро тўлашлари керак бўлади.

Бернарду Силва 2017 йилдан буён «Манчестер Сити» шарафини ҳимоя қилиб келаётган эди. У «шаҳарликлар» таркибида барча мусобақаларда жами 460 та учрашувда майдонга тушиб, 76 та гол урди ва 77 та голли узатмани амалга оширди. Манчестер клуби сафида португалиялик футболчи 20 та совринни қўлга киритган.