Мадриднинг «Атлетико» клуби аргентиналик ҳимоячиси Науэль Молина ёзги трансфер ойнасида клубини ўзгартириши мумкин. Бу ҳақда таниқли инсайдер Николо Скира хабар тарқатди.
Манба берган маълумотларга кўра, сўнгги кунларда 28 ёшли футболчи Италия А Серия клубларидан бир нечта таклиф олган. Қайд этиш лозимки, Молина аввал ҳам Италияда тўп сурган: у 2020 йилдан 2022 йилгача «Удинезе» шарафини ҳимоя қилган ва айнан ўша ердан «Атлетико»га кўчиб ўтган эди.
Якунланган клуб мавсумида Молина барча мусобақаларда жами 46 та учрашувда майдонга тушиб, 2 та гол урди ва 4 та голли узатмани ўз ҳисобига ёздириб қўйди.
