Франция терма жамоаси ҳужумчиси Килиан Мбаппе ўзининг ватандоши Усмон Дембеле ҳақида ўз фикри билан ўртоқлашди.
Жаҳон чемпионати – 2026 доирасидаги Сенегалга қарши дастлабки ўйиндан (3:1) кейин Дембеле мухлислар томонидан танқидларга учраган эди. Ироқ билан бўлиб ўтган охирги учрашувда (3:0) «Олтин тўп» соҳиби гол урди ва битта голли узатмани амалга оширди.
«Ҳаммамиз Усмон Дембеленинг гол уришини хоҳлаган эдик. Биз унга ўз имкониятларини кўрсатиши учун шароит яратиб беришимиз керак эди, у биз учун жуда муҳим», — дея Мбаппенинг сўзларини келтиради журналист Фабрицио Романо.
Гуруҳ босқичининг сўнгги турида Франция Норвегия билан тўқнаш келади. Ўйин 26 июнь куни бўлиб ўтади.
