Германия терма жамоаси гуруҳ босқичининг учинчи туридан ўрин олган Эквадорга қарши ўйинда рақибга амалда ғалабани совға қилди. Ҳатто немислар майдонга туширган таркиб ҳам уларнинг бор кучлари билан ўйнамоқчи эмасликларига шама қилиб турарди. Ушбу таркибнинг ўртача ёши 30 ёш-у 170 кунни ташкил этди ва бу — Германия терма жамоасининг 21-асрда Жаҳон чемпионатларидаги энг ёши катта таркиби бўлди.
Бундан ҳам ёши каттароқ таркибни немислар охирги марта 1998 йилда, Франциядаги Жаҳон чемпионатининг чорак финалида Хорватияга қарши баҳсда майдонга туширишган эди. Ўшанда хорватлар уларни 3:0 ҳисобида мағлуб этганди.













