Франциялик таниқли ҳимоячи Эльяким Мангаля профессионал футболчилик фаолиятини якунлаганини эълон қилди. 35 ёшли футболчи ўз қарори ҳақидаги хабарни ижтимоий тармоқлардаги саҳифасида қолдирди.

«Мен турли мамлакатларда ўйнадим, жуда кўп инсонларни учратдим ва янги тилларни ўргандим. Буларнинг барчаси ҳаётимда ажойиб тажрибага айланди. Омадим чопган экан», — деди Мангаля ўз фаолияти ҳақида гапирар экан.

Ҳимоячи 2014–2019 йилларда «Манчестер Сити» либосида кўрсатган ўйинлари орқали машҳурликка эришган эди. Мангаля «шаҳарликлар» таркибида Англия Премьер-лигаси чемпионлигини қўлга киритган. Шунингдек, франциялик футболчи фаолияти давомида Испаниянинг «Валенсия», Португалиянинг «Порту», Бельгиянинг «Стандард» ва бошқа жамоаларда ҳам тўп суришга улгурган. Мангалянинг охирги иш жойи Боливиянинг «Ориенте Петролеро» клуби бўлди.