«Манчестер Сити» директорлар кенгаши раиси Ҳалдун ал-Муборак италиялик мураббий Энцо Мареска билан шартнома имзоланганига муносабат билдирди.

46 ёшли мутахассис инглиз клубида 2029 йилнинг ёзига қадар фаолият юритади. Эслатиб ўтамиз, у бундан аввал Лондоннинг «Челси» клубини бошқараётган эди.

«Энцо доимо ўз мураббийлик фаолиятида янги синовлардан ўтиш ва муваффақиятга эришиш имкониятларини излаб келган. У ишга ўзига хос характер, иштиёқ ва заковат олиб киради, бу эса бизнинг талабларимизга тўлиқ мос келади. Унинг «Манчестер Сити»га қайтиши — ҳам унинг ўзи, ҳам клуб учун кейинги мантиқий қадамдир», — дея бошчининг сўзларини келтиради «шаҳарликлар» матбуот хизмати.

«Манчестер Сити» якунланган мавсумда Англия Премьер-лигасида ғолиб чиқа олмади. Жамоа чемпионликни «Арсенал»га бой бериб, иккинчи ўринни эгаллади.