Ла Лига раҳбари Хавьер Тебас Жоан Лапортани «Барселона» президенти сайловида қўлга киритган ғалабаси билан қутлади. Испания лигаси президенти Лапортанинг инаугурация маросимида нутқ сўзлади.

«Авваламбор, Лапорта ва унинг янги директорлар кенгашини сайловдаги муваффақият билан табрикламоқчиман. Ишончим комилки, яқин йилларда улар катта ютуқларга эришадилар. «Барселона»да амалга оширилаётган барча ишлар, жумладан, стадион реконструкцияси ҳам муваффақиятли бўлади. Бу янгиланиш Ла Лига учун жуда муҳим, айниқса, гап дунёнинг энг яхши клубларидан бири ҳақида кетаётганини ҳисобга олсак.

Орамизда келишмовчиликлар бўлган. Улар доим учраб туради, лекин биз ташкилотни ҳамиша ҳурмат қиламиз. Қарашларимиз турлича бўлиши мумкин, бироқ ҳар доим энг яхши қарорга келишга интиламиз. «Барса»нинг ишлари доимо бекаму кўст бўлишига умид қиламан.

Ортда қолган бир неча йил жуда қийин бўлди, лекин улар ҳозир тўғри йўлдан кетишмоқда. Жоан, сенга улкан зафарлар тилайман, чунки «Барса»нинг муваффақияти — бу Ла Лиганинг ҳам муваффақиятидир», — деди Тебас.