Германияда 2024 йилги Европа чемпионатини ўтказиш билан боғлиқ эҳтимолий коррупция ҳолатлари юзасидан тергов давом этмоқда.

Бу ҳақда Bild нашри хабар бермоқда.

Чоршанба куни ҳуқуқ-тартибот идоралари ходимлари Германия футбол иттифоқининг бош қароргоҳида, шунингдек, яна бир қатор ташкилотларда тинтув ишларини олиб боришди. Прокуратура ва полициянинг маълум қилишича, улар турли шахсларга, жумладан, халқаро футбол учрашувларига ташриф буюришлари учун «ноқонуний устуворликлар тақдим этилиши» ҳолатларини тергов қилишмоқда.

Тергов талқинига кўра, мезбон шаҳарлардан бирининг вакили мусобақани ўтказишга масъул бўлган компания вакилларидан худди шундай ҳуқуқни қўлга киритган. Бундан ташқари, ўйинларни қабул қилган шаҳарларга чипталарни олдиндан сотиб олиш бўйича эксклюзив ҳуқуқлар тақдим этилганликда гумон қилинмоқда.