The Telegraph нашрининг хабар беришича, ҳимоячи Эзри Конса «Арсенал» клубининг эътиборини тортди.

Аввалроқ лондонликларнинг «Астон Вилла»нинг яна бир аъзоси — ярим ҳимоячи Морган Рожерсга жиддий қизиқиш билдираётгани ҳақида хабар берилган эди.

Нашрнинг берган маълумотларига кўра, «Вилла» Рожерсни 130 миллион фунтга баҳолаган, бу эса «Арсенал» ушбу футболчи учун тўлашни режалаштирган маблағдан анча кўпдир.

«Тўпчилар» Рожерснинг нархини туширишга ҳаракат қилиб кўришадими-йўқми, ҳозирча номаълум, бироқ эндиликда уларнинг Консага ҳам қизиқиш билдираётгани ойдинлашди.

Ҳимоячининг амалдаги шартномаси тугашига икки йил қолган ва катта эҳтимол билан «Астон Вилла» уни тахминан 60 миллион фунтга баҳолайди. Бу маблағ ҳам «Арсенал» 28 ёшли футболчи учун ажратмоқчи бўлган суммадан юқоридир.

Ҳозирча «Арсенал» Рожерс ва Конса бўйича расмий таклиф киритадими ёки улардан фақат биттасининг трансфери билан чекланадими, номаълум. Ҳимоячи номзодини Премьер-лигадаги муваффақиятни янада ривожлантириш ва Чемпионлар лигаси финалига қайта чиқиш йўлларини излаётган бош мураббий Микель Артета таклиф қилган деб ҳисобланмоқда.

Консанинг майдондаги энг севимли позицияси — ҳимоя маркази ҳисобланади, бироқ у ўнг қанот ҳимоясида ҳам муваффақиятли тўп сура олади.