Каталониянинг "Барселона" клуби дарвозабони Марк-Андре тер Штеген Нидерландиянинг "Аякс" жамоасига ўтмоқда. Келишув клублар даражасида ҳам, футболчининг агентлари билан ҳам тўлиқ ҳал этилган. Бу ҳақда нуфузли журналист Фабрицио Романо ўз ижтимоий тармоқлардаги саҳифаларида хабар бермоқда.
34 ёшли дарвозабон "Аякс" сафига 2027 йилнинг ёзига қадар ижара ҳуқуқи асосида ўтади. Манбанинг берган маълумотларига кўра, футболчи маошининг катта қисмини айнан Нидерландия клуби тўлаб беради.
Тер Штеген 2014 йилдан буён "Барселона" шарафини ҳимоя қилиб келаётган эди. У 2025/2026 йилги мавсумнинг иккинчи ярмини "Жирона"да ижарада ўтказди, бироқ жароҳати сабабли у ерда атиги 2 та ўйинда иштирок эта олди, холос.
"Аякс" келаси мавсумда Конференциялар лигасида иштирок этади.
