«Реал Сосьедад» ва Испания терма жамоаси ҳужумчиси Микель Оярсабални «Барселона»га ўтиши билан боғлашда давом этишмоқда.
29 ёшли футболчи «кўк-анорранглилар»нинг Хулиан Альварес бўйича музокаралари муваффақиятсиз якунланган тақдирда, «заҳирадаги» трансфер мақсадларидан бири ҳисобланади. Испаниялик форварднинг ЖЧ-2026 турниридаги ёрқин ўйини унинг эҳтимолий трансфери ҳақидаги гап-сўзларга қўшимча баҳона бўлди.
«Мен «Реал Сосьедад»да жуда бахтли эканлигимни айтгандим. Бу менинг уйим. Бу клуб мени ҳатто энг қийин дақиқаларда ҳам қўллаб-қувватлаган. Айнан «Реал Сосьедад» туфайли мен ҳозир шу ерда, Испания терма жамоасидаман», — деди Оярсабаль журналистлар билан суҳбатда.
6 июль куни «қизил фурия» ЖЧ-2026 1/8 финал учрашувида Португалияга қарши майдонга тушади.
