Бразилия терма жамоаси ЖЧ-2026нинг 1/8 финал босқичида Норвегиядан мағлубиятга учраб (1:2), мусобақани тарк этди.
Турнир давомида Жанубий Америка жамоасига 67 ёшли мутахассис Карло Анчелотти устозлик қилди. Италиялик мураббий «селесао»ни орзиқиб кутилган соврин сари бошлай олмади.
Шу тариқа, Анчелотти охирги бир ярим йил ичида бирорта ҳам турнирда ғолиб чиқа олмади.
2025 йилда италиялик мураббий қўл остидаги «Реал» на Ла Лигани, на Чемпионлар Лигасини, на Испания Суперкубоги ва на Қирол Кубогини қўлга кирита олди. 2024/25 йилги мавсум якунланганидан сўнг, мураббий Испания клубини тарк этди ва Бразилия терма жамоасини бошқаришга киришди.
Анчелотти бошқараётган жамоалар 2024 йилнинг декабрь ойидан бери соврин юта олмаяпти. Ўшанда «Реал Мадрид» ФИФА Қитъалараро кубоги соҳибига айланган ва мазкур турнир доирасида фақатгина битта ўйин — «Пачука»га қарши финал баҳсида (3:0) майдонга тушган эди.
Бундан олдинроқ, 2024 йилнинг август ойида «қаймоқранглилар» «Аталанта» устидан ғалаба қозониб (2:0), УЕФА Суперкубогида зафар қучишганди.
Агар якуний муваффақиятга эришиш учун биттадан кўп ўйин ўтказиш талаб этиладиган йирик турнирларни ҳисобга оладиган бўлсак, Анчелотти жамоалари 2024 йилнинг 1 июнидан буён бундай мусобақаларда ғолиб бўлолмаяпти. Ўша оқшом «Реал» Чемпионлар Лигаси финалида Дортмунднинг «Боруссия» клубидан устун келган эди (2:0).
