Мексика терма жамоаси ва «Тихуана» клуби ярим ҳимоячиси Хильберто Мора Лондоннинг «Арсенал» клубига ўтиши мумкин.
«Канонирлар» 17 ёшли футболчининг трансфери устида аллақачон иш бошлашган, дея хабар бермоқда Transfer News Live нашри El Universal'га таяниб. Порлаётган юлдузга Англия Премьер-лигасининг бошқа бир гранди — «Ливерпуль» ҳам қизиқиш билдирмоқда.
Хильберто Мора ЖЧ-2026 да Мексика терма жамоаси сафида тўртта ўйинда майдонга тушди ва уларнинг учтасини асосий таркибда бошлади. Ярим ҳимоячи Пеле давридан бери мундиалнинг плей-офф босқичида ўйнаган энг ёш футболчига айланди.
Мексикалик вундеркинднинг «Тихуана» билан шартномасида 23 миллион евро миқдорида товон пули белгиланган.
