Мадриднинг «Реал» клубида 34 ёшли дарвозабон Тибо Куртуанинг эҳтимолий ўринбосарлари муҳокама қилина бошланди. Бу ҳақда Mundo Deportivo нашри хабар бермоқда.
Манбанинг маълумотларига кўра, номзодлар орасида «Брайтон» ва Нидерландия терма жамоаси голкипери Барт Вербрюгген тилга олинган. Бундан ташқари, клуб ўз академиясига ҳам ишонч билдирмоқда, у ерда асосий даъвогар сифатида «Реал Кастилья» дарвозабони Фран Гонсалес кўрилмоқда.
Шу билан бирга, бугунги кунда Куртуанинг ўрнини босадиган футболчи йўқлиги, шу сабабли янги дарвозабон билан шартнома имзолаш масаласи шошилинч эмаслиги қайд этилган.
Тибо Куртуа 2018 йилдан буён «Реал» таркибида тўп тепиб келмоқда. 2022 йилнинг октябрь ойида у 2021/2022 йилги мавсумнинг энг яхши дарвозабони сифатида Лев Яшин совринини қўлга киритган эди.
Ҳозирда Куртуа ЖЧ-2026да иштирок этиш учун Бельгия терма жамоаси ихтиёрида бўлиб турибди.
