Каталониянинг «Барселона» клуби Дортмунднинг «Боруссия» ҳужумчиси Карим Адейемини ўз сафига қўшиб олишга ҳақиқатдан ҳам яқин турибди. Бироқ, бу трансфер клубнинг «Атлетико» форварди Хулиан Альваресга бўлган позициясига таъсир қилмайди. Адейеми трансферидан кейин ҳам «кўк-анорранглилар» аргентиналик футболчини сотиб олиш устида ишлашда давом этадилар. Бу ҳақда журналист Жерар Ромеро ўз ижтимоий тармоқларида хабар берди.
Аввалроқ Альварес «Атлетико»ни тарк этиш истаги борлигини очиқ эълон қилганди. Бироқ Мадрид клуби футболчини ўз сафида сақлаб қолишга уринмоқда.
2025/2026 йилги Германия чемпионати мавсумида 24 ёшли Адейеми 28 та ўйинда майдонга тушиб, еттита гол урди ва тўртта голли узатмани амалга оширди. Шунингдек, унинг ҳисобида Чемпионлар лигасида тўққизта ўйин, учта гол ва иккита голли узатма бор.
