«Галатасарой» «Манчестер Сити» ярим ҳимоячиси Фил Фоденни сотиб олишга уриниб кўрмоқда. Бу ҳақда Fanatik хабар берди.

Манбага кўра, Туркия клуби 26 ёшли футболчининг эҳтимолий трансфери шартларини билиш учун «Сити» билан расмий алоқаларни бошлаб юборган. «Галатасарой» президенти музокараларни олиб боришни аввалроқ бир қатор юлдуз футболчиларнинг Истанбул клубига ўтишида иштирок этган италиялик агент Жорж Гардига топширган.

Таъкидланишича, бозор қиймати тахминан 70 миллион еврога баҳоланаётган Фоден фаолиятида янги босқични кўриб чиқмоқда. Инглиз ярим ҳимоячисининг «Манчестер Сити» билан тузган шартномаси якунига етишига бир йил қолди.

Ўтган мавсумда Фоден Англия чемпионатининг 33 та ўйинида 7 та гол урди ва 5 та голли узатмани амалга оширди.