Афсонавий аргентиналик футболчи Диего Марадонанинг 1986 йилги Жаҳон чемпионатида таққан сардорлик боғичи 512 минг АҚШ долларига аукционда сотилди. Савдони Sotheby’s аукцион уйи ташкил этди.

Тарихий лот 1986 йилги Жаҳон чемпионатининг чоракфиналида Аргентина ва Англия терма жамоалари ўртасида ўтказилган учрашув билан боғлиқ. Ўша баҳсда Аргентина 2:1 ҳисобида ғалаба қозонган.

Мазкур учрашувда Марадона иккита гол урган. Улардан бири қўл билан киритилгани учун футбол тарихига “Худонинг қўли” (“Hand of God”) номи билан кирган. Ушбу эпизод Жаҳон чемпионатлари тарихидаги энг машҳур воқеалардан бири ҳисобланади.

Бундан ташқари, Марадона шу куни “аср голи”га муаллифлик қилган ва Англиянинг бутун таркибини алдаб ўтиб, рақиб дарвозасини ишғол қилган. Шунингдек, ушбу тўп ҳам аукционга қўйилади. Мутахассислар ушбу тарихий экспонатнинг қийматини 10 миллион АҚШ долларига баҳоламоқда.

Heritage Auctions аукцион уйи маълумотига кўра, 1986 йилги расмий Жаҳон чемпионати тўпи махсус фотоэкспертиза орқали Марадонанинг иккала машҳур голида айнан шу тўп ишлатилгани тасдиқланган. Аукцион ойнинг охирида бошланиб, 21–23 август кунлари якунланади.

Бу тўп аввал ҳам аукционга қўйилган эди. 2023 йил февраль ойида Голдин аукционида унга 2,04 миллион доллар таклиф қилинган, бироқ сотувчи белгилаган минимал нархга етилмагани сабаб савдо амалга ошмаган.

Heritage Auctions бу сафар ҳам минимал нархни ошкор қилмаган, бироқ компания тўпнинг 10 миллион долларга яқин нархда сотилишига ишонмоқда.

Учрашувдан кейин тўп 1986 йилги Аргентина — Англия баҳсини бошқарган тунислик ҳакам Али Беннасир қўлига ўтган. 2023 йилдаги аукцион тавсифида Беннасирнинг мактубидан қуйидаги иқтибос келтирилган:

“Жаҳон чемпионати учрашувини бошқарган бош ҳакам ўйин тугагач тўпни ўзида сақлаб қолади ва унинг ягона эгасига айланади. Ушбу учрашув давомида захира тўпидан фойдаланилмаган”.

Кейинчалик FIFA вакили The Guardian нашрига Жаҳон чемпионати тўплари одатда жамоалар, ҳакамлар, мезбон шаҳарлар, FIFA ҳамкорлари ва FIFA музейига эсдалик сифатида тарқатилишини маълум қилган.

Аввалроқ яна бир тарихий лот — Пеленинг 1958 йилги Жаҳон чемпионати финалида кийган либоси ҳам аукционда қарийб 5 миллион АҚШ долларига сотилганди.

Ҳозирча бу борадаги рекорд 2022-йилда ўрнатилган бўлиб, айнан Диего Марадонанинг 1986 йилги Жаҳон чемпионатида Англияга қарши ўйинда кийган футболкаси 9,28 миллион долларга сотилган эди.