«Барселона» Мадриднинг «Атлетико» клуби ҳужумчиси Хулиан Альварес бўйича музокаралар муваффақиятсиз якунланган тақдирдаги вариантларни ўрганиб чиқмоқда.
«Матрасчилар» аргентиналик футболчини сотишни истамаяпти, «кўк-анорранглилар» эса трансфер ойнаси ёпилгунига қадар жавоб кутишмоқчи эмас. TEAMtalk хабарига кўра, Каталония гранди бозордаги муқобил вариантлар сифатида Душан Влахович ва Дарвин Нуньесни белгилаган. 26 ёшли сербиялик футболчи «Ювентус» билан хайрлашганидан сўнг эркин агентга айланган бўлса, 27 ёшли уругвайлик ҳужумчи «Ал-Ҳилол» режаларига киритилмаган.
Шунингдек, «Барселона» Жоао Педро ва Эли Жуниор Крупига ҳам қизиқиш билдирган эди, бироқ «Челси» ва «Борнмут»нинг талаблари Испания чемпионларини қаноатлантирмади.
