«Милан»нинг қанот ҳужумчиси Кристиан Пулишич фаолиятини Туркия чемпионатида давом эттириши мумкин. Бу ҳақда Tuttomercato хабар бермоқда.

Манба берган маълумотларга кўра, АҚШ миллий терма жамоаси футболчиси ёзги мавсумлараро танаффусда ҳужум чизиғини кучайтиришни мақсад қилган «Галатасарай»нинг трансфер нишонига айланган. «Милан» эса Пулишич билан хайрлашмоқчи эмас — клуб раҳбарияти, жумладан, эгаси Жерри Кардинале форвардни жамоа етакчиларидан бири сифатида кўрмоқда.

Ўтган мавсумда 27 ёшли америкалик футболчи «россонери» сафида барча турнирларда 34 та ўйинда майдонга тушиб, ўз ҳисобига 10 та гол ва 4 та маҳсулдор узатмани ёзиб қўйди. Пулишичнинг клуб билан амалдаги меҳнат шартномаси келаси ёзда ўз ниҳоясига етади.