«Манчестер Юнайтед» «ПСЖ» ярим ҳимоячиси Уоррен Заир-Эмерига қизиқиш билдирмоқда. Top Mercato хабарига кўра, Англия клуби парижликларнинг музокараларга тайёрлигини синаб кўриш учун 60 миллион евро миқдорида таклиф тайёрламоқда.

20 ёшли француз «қизил иблислар»нинг марказни кучайтириш бўйича асосий нишонлари қаторига киради. Манбага кўра, парижликлар ўзларининг энг истиқболли футболчиларидан бири билан хайрлашишни истамаяпти.

Ўтган мавсумда Заир-Эмери барча турнирларда 54 та ўйинда майдонга тушиб, 3 та гол урди ва 5 та голли узатмани амалга оширди. Футболчининг «ПСЖ» билан амалдаги шартномаси 2029 йилнинг ёзигача мўлжалланган ва унда яна бир мавсумга узайтириш опцияси мавжуд.