Хосеп Гвардиола ва Италия футбол федерацияси ҳозирча шартнома шартлари бўйича бир қарорга кела олишмаяпти. Испаниялик мураббий FIGC томонидан уни Италия терма жамоаси бош мураббийлигига тайинлаш учун қилинаётган ҳаракатлардан «ҳайратда», бироқ айни дамда унинг талаблари жуда юқори: La Gazzetta dello Sport хабарига кўра, Пеп йилига 20 миллион евро маош сўрамоқда, федерация эса унга бундан икки баравар кам маблағ таклиф қилмоқда.
Аввалроқ Гвардиола «Манчестер Сити»да фаолият юритган — у «шаҳарликлар» постини ўн йил давомида эгаллаб келган эди.
Италия терма жамоаси ЖЧ-2026 йўлланмаси учун кечган плей-офф финалида Босния ва Герцеговинага имкониятни бой бериб, турнирга чиқа олмади. Ушбу омадсизликдан сўнг «скуадра адзурра»нинг собиқ бош мураббийи Женнаро Гаттузо ўз лавозимини тарк этди.
