Португалия терма жамоасининг собиқ аъзоси Луиш Фигу «Манчестер Сити» ярим ҳимоячиси Родри Эрнандеснинг «Реал»га ўтиши мумкинлиги ҳақидаги хабарларга муносабат билдирди.

«Родрининг «Реал»га ўтиш имконияти ҳақида гап-сўзлар бўлганини биламан. Фикримча, бу жуда қийин бўлади, чунки унинг «Манчестер Сити» билан амалдаги шартномаси бор. Бироқ «Реал» ҳамиша дунёнинг энг яхши футболчиларини ўз сафига қўшиб олишни исташини ҳамма билади», — дея Фигунинг сўзларини келтиради Diario AS.

Мадрид клубининг собиқ ярим ҳимоячиси, шунингдек, Родрини Килиан Мбаппе, Витинья ва Дезире Дуэ билан бир қаторда «Олтин тўп»га номзодлар сифатида эътироф этди.

Родрининг амалдаги шартномаси 2027 йилнинг ёзида якунига етади. Ўтган мавсумда 30 ёшли футболчи 33 та ўйинда майдонга тушиб, 2 та голли узатмага муаллифлик қилган.