UFC президенти Дана Уайт уни «абадий дўст» деб атаган Жон Жонснинг гапларига муносабат билдириб, бу фикрга қўшилишини айтди. Уайт, шунингдек, улар ўртасидаги мураккаб ишчи муносабатларга қарамай, Жонсни ММА тарихидаги энг буюк жангчи деб билишини яна бир бор тасдиқлади.

«Ҳа, Жон иккимизнинг вазиятимиз жуда ўхшаш. Бунинг бизнес томони ва шахсий томони бор, аммо бизнес нуқтаи назаридан ҳам мен ҳамиша Жон Жонсни ҳурмат қиламан. Жон ўзининг ким эканини ва нималарга эришганини жуда яхши тушунади, бу ерда ҳеч қандай хом хаёлга ўрин йўқ. Мен айтганман ва яна бир бор такрорлайман: у барча даврларнинг энг буюк жангчисидир. У ўзи ғалаба қозонган кўплаб жангларга энг яхши спорт формасида етиб келмаган ва ўзига нисбатан лозим бўлгандек муносабатда бўлмаган.

Жонс фаолиятини якунлаганидан сўнг, саҳна ортида нималар содир бўлгани ҳақидаги барча воқеалар айтила бошланганида, у нималарни бошдан кечиргани аён бўлади. Бу инсоннинг қилган ишлари, кейин эса октагонга чиқиб, уни мағлуб этиш учун бор кучи билан машғулот ўтказган дунёнинг энг яхши жангчиларини тор-мор этгани — шунчаки ақлбовар қилмас ҳодисадир», — деди Уайт MMAJunkie нашрига.