Испания терма жамоаси бош мураббийи Луис де ла Фуэнте ўз жамоаси ЖЧ-2026да ўтказган ҳар бир ўйин ҳақида қисқача тўхталиб ўтди.
Испанияликлар Евро-2024даги ғалабадан сўнг жаҳон чемпионлигини ҳам қўлга киритишди.
«Кабо-Верде билан ўйин (0:0) бизни осмондан ерга туширди ва ушбу турнир аслида қандай бўлишини кўрсатиб қўйди. Биз ҳамма учун канчалик қийин бўлишини ва жаҳон чемпионати, яна бир бор такрорлайман, Европа чемпионати билан умуман ўхшаш эмаслигини тушуниб етдик. Саудия Арабистони билан кечган баҳс (4:0) эса вазиятнинг бутун мураккаблигини англаб етганингда хотиржамликни сақлаш ва ўзингга ишониш кераклигини тасдиқлади.
Уругвайга қарши ўйинда (1:0) мен биринчи навбатда жамоанинг улғайганини ва рақибнинг қоидалари бўйича ўйнамаганимизни таъкидлаган бўлардим. Биз бардошлилик ва юқори футбол маҳоратини кўрсатдик. 1/16 финалда Австрияга қарши баҳсда (3:0) яна бир қадам олдинга ташладик ва аввалги ўйинларда эришган муваффақиятларимизни мустаҳкамладик.
Роналдунинг Португалиясига қарши учрашув (1:0) олдидан бу муддатдан илгари финал бўлиши мумкинлигини айтгандим. Португалия асосий фаворитлардан бири ҳисобланарди ва бизни бор кучимизни ишга солишга мажбур қилди. Бельгия билан 1/4 финал (2:1) эса кутилмаган хавф туғдириши мумкин бўлган ўйиндек туюлди. Улар жуда тезкор ва динамик ўйнашди. ЖЧдаги илк голни ўтказиб юборган бўлсак-да, совуққонликни сақлаб қолдик.
Ярим финалда бизни Мбаппенинг Францияси (2:0) — сўзсиз фаворит кутиб турган эди. Аммо, чамамда, трибунадаги мухлислар жамоамизга қараганда кўпроқ ҳаяжонланишди. Биз яхлит бир жамоа сифатида ҳаракат қилдик ва ўйинни бошидан охиригача назоратда ушлаб турдик. Ҳар бир футболчи ўзини ажойиб томондан кўрсатди, лекин жамоа сифатида янада кучлироқ эдик.
Аргентина билан баҳс (1:0) эса барча ўйинларнинг энг каттаси бўлди. Амaлдаги жаҳон чемпиони, уч карра турнир ғолиби, Мессининг хайрлашуви… Орзудаги ўйин. Бу ғалаба барчасига якун ясади ва бутун чемпионат давомида интилган мақсадимизнинг мантиқий хотимаси бўлди. Якунда бутун турнир айнан биз аввалдан режалаштирганимиз ва тасаввур қилганимиздек ўтди», — деди де ла Фуэнте Marca нашрига берган интервьюсида.
