Ўзбекистон Суперлигасининг 14-туридан ўрин олган “Пахтакор”га қарши ўйиндан кейин “Бунёдкор” футболчиси Билол Тошмирзаев футболчилар 6 ойдан бери маош олмаётганини айтиб ўтди.

“Йигитларда руҳий тушкунлик бор. 6 ойдан бери ойлик олмаяпмиз. Масалан, мен йилнинг бошидан бери пул олганим йўқ. Шунга қарамасдан, йигитлар меҳнат қиляпти. Кейинги ўйинларга қандай тайёргарлик кўрамиз, билмадим... 2 ойдан бери сув йўқ. Бу муаммо бир марта айтилди, икки марта айтилди, ҳеч ким қарамаганидан кейин ҳадеб қайтавермаймиз-ку... Раҳбарият ҳамма шароитни кўриб турибди. Улар ҳам қўлидан келганини қиляпти... Билмадим энди нима бўлади... Ҳаммани оиласи бор, 6 ой уйга пул олиб кирмасангиз, улар қаерда кун кўради, тўғрими? Мураббийлар ҳам 5 ойдан бери маош олмаяпти. Улар Европадан келган. Уларни кимдир тушунадими, тушунмайдими, билмайман”, деди Тошмирзаев.

Аввалроқ, “Ўзбекнефтгаз” акциядорлик жамияти шу йилдан бошлаб “Насаф”, “Бухоро” ва “Бунёдкор” клубларини молиялаштиришни тўхтатишини маълум қилганди.

“Пахтакор”га қарши кечган учрашувда “Бунёдкор” 0:1 ҳисобида мағлубиятга учради. Ўйин давомида трибунадаги мухлислар томонидан “Алиев оут!” деб ёзилган баннер кўтарилди.

Маълумот учун, Мурод Алиев 2023-йилдан бери клуб бош директори вазифасида ишлаб келмоқда.