Англиянинг «Борнмут» клуби форварди Эли Жуниор Крупи Каталониянинг «Барселона» клубига ўтиб қолиши мумкин. Бу ҳақда Sport.es нашри хабар бермоқда.

Журналистларнинг маълумотига кўра, «кўк-анорранглилар» вакиллари 20 ёшли француз ҳужумчисининг агентлари билан боғланишган. Томонлар эҳтимолий трансфер тафсилотларини муҳокама қилишган.

«Барса» Крупига Мадриднинг «Атлетико» клуби шарафини ҳимоя қилаётган аргентиналик Хулиан Альваресга муқобил вариант сифатида қарамоқда.

Англия Премьер-лигасининг ўтган мавсумида ҳужумчи «Борнмут» сафида 33 та учрашувда майдонга тушди. Франциялик футболчи ўз ҳисобига 13 та гол ёзиб қўйган бўлиб, улардан иккитасини 11 метрлик нуқтадан киритган.