«Ньюкасл» бош мураббийи Эдди Хау эгаллаб турган лавозимини тарк этишга яқин турибди. Бу ҳақда таниқли инсайдер ва журналист Фабрицио Романо ижтимоий тармоқларда хабар бермоқда.
Инсайдернинг таъкидлашича, мураббийни алмаштириш бўйича қарор аллақачон қабул қилинган. «Олашақшақлар» Хаунинг ўрнига янги мутахассис излашни бошлашган. 48 ёшли англиялик мураббий 2021 йилнинг ноябрь ойидан бери жамоани бошқариб келаётган эди.
Ўтган Англия Премьер-лигаси мавсумида «Ньюкасл» анча омадсиз иштирок этди. Жамоа Хау бошчилигида 49 очко жамғариб, турнир жадвалида бор-жоғи 12-ўринни эгаллади.
Эслатиб ўтамиз, 8 август куни «Ньюкасл»нинг режасида ўртоқлик учрашуви бор. Клубга Испаниянинг «Валенсия» жамоаси рақиблик қилади.
