Ўзбекистон Футбол Ассоциациясининг миллий терма жамоалар бўлими бошлиғи Усмон Тошев Россияга қарши ўртоқлик ўйини ўтказиш бўйича фикр билдирди.
"Биз Россия терма жамоаси билан ўйнашга тайёрмиз ва бундан хурсанд бўламиз. Ҳозирда бизда фақат битта тасдиқланган ўртоқлик ўйини бор - октябрь ойида Жанубий Кореяга қарши. Шунинг учун биз Россия терма жамоаси билан сентябрь-октябрь ойларида ёки ноябрь ойида ўйнаш имкониятини кўриб чиқишимиз мумкин.
Жамоаларимиз охирги марта тўрт йил олдин учрашишган, яна шундай кучли рақиб билан ўйнаш бизга қизиқ бўларди. Албатта, қарор қабул қилишда биз Ассоциациянинг мавжуд таклифларини, бошқа Осиё жамоалари билан музокараларни ва бош мураббий Фабио Каннаваро фикрларидан келиб чиқамиз.
Агар тегишли таклиф келиб тушса, биз Россия терма жамоасини Тошкентда қабул қилишга ёки Москвага ёки Россиянинг бошқа исталган шаҳрига ўзимиз боришга тайёрмиз. Биз музокараларга тўлиқ очиқмиз ва ушбу ўйинни ўтказиш имкониятини муҳокама қилишдан мамнун бўламиз", деди Тошев.
