«Лилль» президенти Оливье Летан Европанинг топ-клублари, жумладан «Манчестер Сити» ва «Реал Мадрид»нинг ярим ҳимоячи Айюб Буаддига бўлаётган қизиқиши ҳақида гапирди.

«Бу ҳақда бир неча ҳафтадан бери айтяпман. Ҳеч қандай аниқ келишувга интилаётган клублар йўқ. Мовий рангли либосда ўйнайдиган клуб билан ўйинчи алмашиш ҳақидаги миш-мишлар қандай тарқалиб кетганига ҳайронман. Йўқ, бу ёлғон! Жуда, жуда катта клублар томонидан қизиқиш бор, лекин илгари айтганимдек, ҳозирда жуда кам сонли жамоаларнинг Айюбни сотиб олишга қурби етади. Қизиқиш ва бундай грандлардан таклифлар ҳамиша бўлади. Бугунги ягона ҳақиқат шуки — у 100 фоиз «Лилль» ўйинчиси», — дейди Летан Mundo Deportivo нашрига.

Ўтган мавсумда Буадди барча турнирларда 42 та ўйинда майдонга тушиб, 1 та голли узатмага муаллифлик қилди. Унинг клуб билан амалдаги шартномаси 2029 йилнинг ёзигача мўлжалланган. Transfermarkt портали 18 ёшли футболчини 80 миллион еврога баҳоламоқда.