Италия терма жамоасининг собиқ дарвозабони Жанлуиджи Буффон Паоло Мальдини ва Леонардо унга миллий терма жамоалар тизимида раҳбарлик лавозимини таклиф қилишганини айтиб берди.

Буффон Италиянинг асосий ва ёшлар терма жамоалари ишини мувофиқлаштириб бориши (координация қилиши) керак эди, бироқ у фаолиятида танаффус қилишга қарор қилди.

"Мальдини ва Леонардо билан гаплашиш жуда ёқимли бўлди. Улар менга терма жамоалар тузилмасида раҳбарлик лавозимини таклиф қилишди – мен асосий ва ёшлар жамоалари ишини мувофиқлаштиришим керак эди.

Уларнинг иштиёқи қароримга бироз шубҳа уйғотди, лекин барибир ўз фикримда қолдим. 1991 йилдан бери ўзимга 20 кундан ортиқ дам олишга ижозат бермаган эканман.

Энди бутун шу вақт давомида ўзини менга бағишлаган инсонларга — аёлим, фарзандларим ва ота-онамга вақт ажратадиган фурсат келди. Менга қайта куч йиғиб олиш зарур", – деди Буффон.