Бразилиянинг Масейо шаҳрида (Алагоас штати) ўртоқлик ўйини пайтида илгари «Сан-Паулу»нинг ўсмирлар жамоасида ўйнаган 15 ёшли футболчи Микаэл Леандро отиб ўлдирилди, деб хабар бермоқда Globo.

Полиция маълумотларига кўра, ўсмир хатолик қурбони бўлган. Фожиа Понтал-да-Барра районида, у ўйинда иштирок этаётган вақтда юз берган. Унга ва майдондаги бошқа кишиларга қарата ўқ узилган. Ҳужум гиёҳванд моддалар савдосини назорат қилувчи жиноий гуруҳлар фаолияти билан боғлиқ экани тахмин қилинмоқда. Жараҳатланган футболчи шифохонага етказилган, бироқ шифокорлар унинг ҳаётини сақлаб қола олишмаган.

Леандро Масейо чеккасида истиқомат қилар эди. 2026 йил бошида у «Сан-Паулу» академияси жамоаларидан бирида ўйнаб, Copa Fictor турнири ғолибига айланганди. Ушбу турнирнинг ўйинларидан бирида у учрашувнинг энг яхши ўйинчиси деб эътироф этилган.

Қадрдон шаҳрига қайтгач, у фаолиятини маҳаллий CSA клубининг 15 ёшгача бўлган жамоасида давом эттирди. Клуб унинг ҳалок бўлгани муносабати билан расман ҳамдардлик билдирди.

Полиция суриштирув ишларини, гувоҳларни сўроқ қилишни ва ҳодиса жойини кўздан кечиришни бошлаб юборган. Ушбу фожиа сабабли Бразилияда йирик шаҳарларнинг хавфли ҳудудларида ёш спортчиларнинг хавфсизлигини таъминлаш масаласи яна кун тартибига чиқди.