«Ювентус» афсонаси Жанлуиджи Буффон жамоада қайси дарвозабонни кўришни исташини айтиб ўтди.

Таниқли собиқ посбон анчадан бери Туринга кўчиб ўтиши мумкинлиги айтилаётган Гульельмо Викарио номзодини қўллаб-қувватлади. Ҳозирда 29 ёшли италиялик футболчи Англияда — «Тоттенхэм» сафида тўп сурмоқда.

«Викарио аллақачон уч-тўрт йилдан бери Италия терма жамоасига чақирилмоқда, у «Тоттенхэм» билан Европа Лигасида ғолиб чиқди. Ўйлашимча, унда «Ювентус» каби буюк клубда муваффақият қозониш учун зарур бўлган барча сифатлар мужассам», — деди Буффоннинг сўзларини келтирган журналист Николо Скира.

Гульельмо Викарионинг трансфер қиймати Transfermarkt портали томонидан 18 миллион еврога баҳоланмоқда. Дарвозабоннинг «шпорлар» билан амалдаги шартномаси 2028 йилгача мўлжалланган.