Мадриднинг «Реал» клуби собиқ спорт директори Предраг Миятович вингер Винисиус Жуниорнинг шартномасини узайтиришдаги қийинчиликлар билан боғлиқ вазият ҳақида ўз фикрини билдирди. Аввалроқ футболчига Лондоннинг «Арсенал» клуби қизиқаётгани ҳақида хабар берилган эди.

«Ҳатто Мбаппедан кейинги ўринда турсанг ҳам, «Реал»да иккинчи рақам бўлиш дунёнинг исталган бошқа жамоасида биринчи бўлишдан яхшироқдир. Винисиус ёки клубдан кетган бошқа ҳар қандай футболчи билан айнан шу нарса содир бўлиши мумкин: сен хафа бўлиб, қадримга етишмаяпти деб жаҳл билан кетасан. Мен бунақа ҳикояларни 1500 марта эшитганман.

Орадан 20 кун ёки бир ой ўтиб, ўша ўйинчини Лондон, Париж ёки бошқа бир жойда учратасан ва у айтадиган биринчи гап: «Эҳ Худойим, нақадар катта хато қилибман». Ва буларнинг бари 2-3 миллион евро сабабли содир бўлади. Бу жуда катта пул, аммо 20 миллион евро билан ҳам худди шундай яшайсан. Кейин эса ортга қайтгинг келганида, аёнки, ортга йўл бўлмайди», — дейди Миятовичнинг сўзларидан иқтибос келтирган Mundo Deportivo.

Винисиус 2018 йилнинг ёзидан бери «қаймоқранглилар» шарафини ҳимоя қилиб келмоқда. Ушбу давр мобайнида ҳужумчи барча турнирларда 375 та ўйинда майдонга тушиб, 128 та гол ва 100 та голли узатмага муаллифлик қилди. Футболчининг клуб билан амалдаги меҳнат шартномаси 2027 йилнинг ёзигача мўлжалланган. Transfermarkt порталида келтирилган маълумотларга кўра, футболчининг бозор қиймати 140 миллион еврони ташкил этади.