20 сентябрь куни олий лиганинг 19-тур баҳслари старт олади. Ушбу турда "Пахтакор" Қаршида "Насаф" меҳмони бўлади.

Август ойида жамоалар Ўзбекистон Кубогининг ярим финал ўйинида майдонга тушишганди. Бу сафар эса учрашув "Пахтакор"нинг чемпионатда совринли ўринлардан жой олиш масаласини аниқлаб бериши мумкин. Биринчи даврада Владимир Козак киритган тўп "шерлар"га 1:0 ҳисобида ғалаба келтирганди. Қаршида ўтган йили олий лига доирасидаги беллашувда Махарадзе ва Козак урган голлар "Пахтакор"нинг 2:0 ҳисобидаги ютуғини таъминлаганди.

Қизиқарли фактлардан бири сифатида "Насаф"нинг ўз майдонида ўзаро тўқнашувларда охирги 6 мавсумда муваффақиятга эришмаганини келтириш мумкин. Шунингдек, 2010 йилги мавсумдан кейин ўзаро ўйинларда қаршиликлар "Пахтакор" дарвозасини фақат пенальтилар тепиш орқали ишғол қилиб келишмоқда.

Чемпионатлар тарихида жамоалар 33 бор ўйнашган. Улардан 19тасида "Пахтакор", 7тасида "Насаф" ғолиб чиққан. Яна 7 баҳс дуранг билан тугаган. Гол уриш борасида устунлик тошкентликлар тарафида, 47:25.

"Насаф" - "Пахтакор" учрашуви 20 сентябрь, жума куни соат 18:00да бошланади.

«Насаф» (Қарши) – «Пахтакор» (Тошкент)
Ҳакамлар: О.Толибжонов (Тошкент), Р.Ғопуров (Наманган), О.Абдувасилов (Тошкент), В.Серазетдинов (Тошкент)
Назоратчи: С.Нажафалиев (Тошкент).