«Рома» ярим ҳимоячиси Лоренцо Пеллегрини шартномасини бир мавсумга — 2027 йилнинг ёзига қадар узайтириш бўйича келишиб олди. Томонлар ҳужжатларни расмийлаштиришни якунлашмоқда.

30 ёшли футболчининг шартномаси июнь ойида якунига етган эди. Аввалроқ «Рома» ўйинчини олиб қолишдан манфаатдор экани ҳақида хабар берилганди. Баҳорда Пеллегринига А Серия ва АПЛ клублари томонидан қизиқиш бўлган, бироқ футболчи учун «Рома» таркибида ўйнашда давом этиш асосий устувор вазифа эди.

Ўтган мавсумда Лоренцо клуб сафида барча турнирларда 33 та ўйин ўтказди. Ярим ҳимоячи ўз ҳисобига 7 та гол ва 4 та голли узатма ёздириб қўйди. Мавсум охирини Пеллегрини жароҳат сабабли ўтказиб юборди.

«Рома» А Сериянинг ўтган мавсумини учинчи ўринда якунлади ва кейинги мавсум учун Чемпионлар Лигасининг асосий босқичига тўғридан-тўғри йўлланмани қўлга киритди. Бўлажак 2026/27 йилги мавсумда Жан Пьеро Гасперини жамоаси 24 август куни «Фиорентина»га қарши ўйин билан старт олади.