«Бордо» клуби расмий сайтида Рио Мавубанинг жамоа бош мураббийи лавозимини тарк этганини маълум қилди.
Франция терма жамоасининг 42 ёшли собиқ футболчиси апрель ойида жамоа бошқарувини ўз қўлига олган эди, июль ойи бошида эса клуб билан шартномасини 2027 йилгача узайтирган эди. Бу унинг мураббийлик фаолиятидаги илк тажрибаси бўлди.
«Бордо» Риога клуб ривожига қўшган ҳиссаси ва фидойилиги учун — академиядаги меҳнатида ҳам, асосий жамоа раҳбариятидаги фаолиятида ҳам чин дилдан миннатдорчилик билдиради. Клуб шунингдек, унинг профессионаллигини ва «Бордо»га бўлган чексиз садоқатини алоҳида эътироф этади», — дейилади расмий баёнотда.
Арно Кормье «Бордо» бош мураббийи вазифасини вақтинча бажарувчи этиб тайинланди. Клуб ҳозирда янги бош мураббий қидирувини давом эттирмоқда.
Шу ҳафтада «Бордо» Sparta Capital инвестиция фонди томонидан сотиб олингани эълон қилинган эди. Бироқ ушбу битим фақат клуб маъмурий тарзда қуйи лигага тушириб юборилиши бўйича қарорга эътироз билдира олса ва 2024 йилда молиявий муаммолар сабабли сургун қилинган Франциянинг 4-дивизионидаги ўрнини сақлаб қолсагина расмийлаштирилади.
