Ёзги трансфер ойнаси бошида Мюнхеннинг «Бавария» клуби «Манчестер Сити» юлдузи Родри билан боғлангани ҳақида миш-мишлар тарқалган эди. Бироқ Bild нашрининг футбол бўлими раҳбари Кристиан Фалькнинг таъкидлашича, бу хабарлар ҳақиқатга тўғри келмайди.

«Мен «Бавария» мутасаддилари билан гаплашдим ва улар буни инкор этишди — ҳеч қандай музокаралар бўлмаган. Улар Родрининг вакиллари билан боғланишмаган. У жуда қизиқарли футболчи, аммо мюнхенликларга ушбу позицияда ўйинчи керак эмас», — деб ёзади Фальк ўз порталида (cfbayerninsider.com).

Инсайдер сўзида давом этади:

«Шу билан бирга, у ҳали ҳам жуда қиммат, чунки «Манчестер Сити» унинг учун 75 миллион евро (64.2 миллион фунт) талаб қилмоқда. Ҳозирда Мадриднинг «Реал» клуби томонидан берилган таклиф 60 миллион евро (51.4 миллион фунт) атрофида. Ўйлайманки, Родрининг Испания Ла Лигасига қайтиши энг эҳтимолли сценарийдир».

Фальк, шунингдек, ўтмишдаги воқеаларни ҳам эслаб ўтди:

«Албатта, «Бавария» томонидан илгари қизиқиш бўлган — аммо бу анча олдин, яъни 2019 йилда эди. Бироқ ўшанда трансферни амалга ошириш учун маблағ етмаган ва «Бавария» унинг ўрнига Лукас Эрнандесни танлаган эди. Мадриднинг «Атлетико» клуби билан махфий учрашувлар бўлиб ўтганди. Шу сабабли «Бавария» ўшанда бундай катта трансферни ўтказиб юборгани жуда аламли. Шунга қарамай, бу ёзда клубнинг уни сотиб олиши шунчаки имконсиз».