«Ливерпуль» «Пари Сен-Жермен» ҳужумчиси Брэдли Барколяни трансфер қилиш бўйича музокараларни давом эттирмоқда.
Трансферлар бўйича машҳур инсайдер Фабрицио Романонинг хабар беришича, Англия клуби француз футболчиси масаласида ишлашда давом этмоқда.
Айни пайтда «ПСЖ» ҳужум чизиғини Ферран Торрес ва Гонсалу Рамуш билан кучайтириш имкониятини кўриб чиқмоқда. Агар парижликлар ушбу икки футболчининг трансферини амалга оширса, жамоанинг ҳужумдаги танлов имкониятлари сезиларли даражада ошади.
Романонинг фикрича, бу ҳолат Барколянинг «ПСЖ»дан кетиши ва «Ливерпуль»га ўтиши учун қулай шароит яратиши мумкин.
«Агар "ПСЖ" Торрес ва Гонсалу Рамушни имзоласа, клубнинг ҳужумда етарлича вариантлари бўлади. Бу эса Баркола трансферини осонлаштириши мумкин», — деди Романо.
Баркола 2023 йилдан буён «ПСЖ» шарафини ҳимоя қилиб келмоқда. Франциялик ҳужумчининг парижликлар билан амалдаги шартномаси 2028 йилга қадар мўлжалланган.
