"Наполи" сардори Жованни Ди Лоренцо клуб билан ҳамкорликни давом эттиришга келишиб олди.
Инсайдер Фабрицио Романо маълумотига кўра, 33 ёшли ҳимоячи неаполликлар билан 2030 йил июнигача мўлжалланган янги шартнома бўйича оғзаки келишувга эришган. Футболчининг агенти билан ҳам барча асосий шартлар келишиб олинган. Энди ҳужжатларни расмийлаштириш қолган.
Ди Лоренцонинг амалдаги шартномаси 2028 йилгача мўлжалланган эди. Янги келишув имзоланиши билан Италия миллий жамоаси ҳимоячиси "Наполи"даги фаолиятини яна икки йилга узайтиради.
Ди Лоренцо "Наполи"га 2019 йил ёзида "Эмполи"дан келиб қўшилган ва кейинчалик жамоанинг асосий футболчиларидан бирига айланди. 2022/23 йилги мавсумдан бошлаб у клуб сардори вазифасини бажариб келмоқда.
Ҳимоячи сардор сифатида "Наполи" билан икки марта Италия чемпионлигини қўлга киритди. Неаполликлар 2022/23 йилги мавсумда 33 йиллик танаффусдан сўнг Скудеттони қўлга киритган бўлса, 2024/25 йилги мавсумда яна А Серия чемпиони бўлди. Клубнинг ўзи ҳам Ди Лоренцони жамоа сардори ва чемпионлик юришининг муҳим фигураларидан бири сифатида таъкидлаган.
Шу тариқа, "Наполи" клубнинг сўнгги йиллардаги асосий етакчиларидан бирини узоқ муддатга сақлаб қолмоқда. Агар янги келишув тўлиқ бажарилса, Ди Лоренцо 2030 йилга келиб неаполликлар сафида 11 йил фаолият юритган бўлади.
