Қозоғистонлик жангчи Бекзат Алмахан UFC рўйхатидан чиқарилди. Бу ҳақда промоушеннинг расмий сайтида маълум қилинди.

Бекзат Алмахан 28 ёшда. Қозоғистонлик жангчи профессионал ММА'даги фаолиятини 2016-йилда бошлаган ва 2024-йилдан UFC'да иштирок этиб келаётган эди.

У дунёнинг энг нуфузли промоушенидаги дебют жангини UFC Fight Night 238 турнирида ўтказган. Унда Алмахан россиялик Умар Нурмагомедовга қарши октагонга кўтарилган ва ҳакамларнинг якдил қарори билан мағлуб бўлган. Кейинчалик у канадалик Бред Катонани нокаутга учратган, шунингдек, грузиялик Александр Топурия (Иля Топуриянинг укаси) ва бразилиялик Ян Матсумотога ҳакамлар қарори билан имкониятни бой берган.

Шунингдек, яна бир қозоғистонлик жангчи Шавкат Раҳмонов сўнгги жангини 2024-йил декабрь ойида UFC 310 турнирида ирландиялик Иан Гаррига қарши ўтказиб, ҳакамлар қарори билан ғалаба қозонган эди. Жароҳат сабабли узоқ вақт жанг қилмагани боис, у 2026-йил бошида UFC рейтингидан чиқариб ташланган.

Маълумот учун, Шавкат Раҳмонов 1994-йилда Сурхондарёнинг Шўрчи туманида туғилган. У 2014-йили Қозоғистон фуқаролигини олган ва оиласи билан Қарағандага кўчиб кетган. Раҳмонов 2020-йилдан бери UFC'да жанг қилиб келади.