"Тоттенхэм" "Ливерпуль" ҳужумчиси Коди Гакпо учун 60 млн фунтдан ортиқ миқдорда дастлабки таклиф юборди. Бу ҳақда SoccerNews хабар берди.
Айни пайтда "Ливерпуль" ушбу таклифни кўриб чиқмоқда. Бироқ "қизиллар" Нидерландия терма жамоаси аъзоси учун янада юқорироқ маблағ олишни режалаштираётгани сабабли биринчи таклифни рад этиши кутилмоқда.
"Тоттенхэм" Эли Ваи трансфери бўйича узоқ давом этган музокаралар натижасиз якунланганидан сўнг эътиборини Гакпога қаратди. Шунингдек, "Манчестер Сити" футболчиси Савиньо ҳам Лондон клуби кўриб чиқаётган вариантлардан бири ҳисобланади.
Хабарларга кўра, Гакпонинг ўзи ҳам жорий ёзда "Энфилд"ни тарк этишга қарши эмас. Англиядаги манбалар 27 ёшли футболчи "Тоттенхэм"га ўтиш вариантини ижобий қабул қилишини билдирмоқда.
Гакпо ўтган мавсум Англия Премьер-лигасида 36 та ўйинда майдонга тушиб, 7 та гол урди ва 5 та голли узатмани амалга оширди.
Нидерландиялик футболчи ПСВдан "Ливерпуль"га ўтганидан кейин жамоанинг асосий таркиб футболчиларидан бирига айланди. У ҳозирга қадар "қизиллар" сафида барча мусобақалар доирасида 130 дан ортиқ учрашувда иштирок этган.
